14 AUG, 2022

沿途高低與你一起走過 廣東歌關注組

「懷愐過去常陶醉  一半樂事  一半令人流淚」填詞人盧國沾先生於1977年寫了這首《每當變幻時》主題是人生變幻無常,但面對無常我們更應樂觀適應。但是當你日漸長大,才發現人生不一定一半樂事,反而令人流淚的事所佔的比例更多。每一首廣東歌都有它的生命和情感,影響每個世代的香港人。

 

猶記得數年之前,大家還在說香港「樂壇已死」,不少人紛紛投入K-pop 的懷抱。但是近年情況出現逆轉,特別在過去兩三年,樂壇百花齊放新人輩出,加上不同形式的音樂類型,令香港人的目光重新投放在本地樂壇,並嘗試在「廣東歌」之中尋找共鳴。

 

樂壇不死  新歌舊曲各有所好

 

對於香港人來說,我們對廣東歌有一種情意結。商台節目《903 廣東歌關注組》的出現也因為「樂壇已死」,叱咤903新晉DJ 阿酸,每星期都會帶着錄音神器,走到街上「扑咪」,紀錄中學生的心聲。「我的角色就係負責訪問不同嘅中學生,叫佢哋拎個手機出嚟,睇吓佢哋個Playlist有咩廣東歌!我走落街,求其捉啲同學仔,原來佢哋都聽廣東歌喎,佢哋都識林家謙、識MC(張天賦)、識Mirror,其實個說服力,會比起我講大好多囉,樂壇係咪死,由佢哋 Prove(證明)番俾你(聽眾)知!」

 

讓阿酸感到驚訝的是,這班千禧後出生的男男女女,不只鍾情於本地樂壇的新歌,反之他們各有所愛,有人迷哥哥(張國榮)梅姐(梅艷芳)、也有人喜歡陳百強與Beyond。他們與這些巨星生於不同時空,但他們的歌曲似乎有一種魔力,將兩代的人於今天相遇相知。 同時,香港電影亦令這群學生,重新認識廣東歌,「好多學生都話,睇完《梅艷芳》呢套戲之後,佢哋就認識咗《夕陽之歌》、《壞女孩》,佢哋同屋企人亦都多咗話題,就係因為梅艷芳、因為廣東歌。」

 

《903廣東歌關注組》 自2021年九月開始播出,每當提到自己一手一腳製作的節目,阿酸總是喋喋不休:「原來真係有一班中學生,好鍾意聽廣東歌,同埋佢哋好犀利㗎,全部有各自嘅門路去宣傳廣東歌,書法又有、畫畫又有、甚至有啲中學生,佢哋自己睇完個MV,好有感覺,然後就續寫故事!」

 

節目的主要訪問對象是中學生,但早前受到第五波疫情影響,不少中學停課, 阿酸便走進了大學校園,傾聽大學生與素人的心聲,阿酸憶述:「印象都比較深刻嘅,就係有一位做刺繡嘅,佢點樣用刺繡嚟宣揚廣東歌,就係聽完首歌之後,佢好有畫面,佢就真係一針一線,去做番嗰個刺繡出嚟!咁我就見到咁多五花八門嘅嘢都幾得意,咁所以就想介紹俾大家聽。」

 

自小與電台結緣   阿酸:電台不死!

 

眼前的小妮子性格爽朗直率, 鏡頭前自信滿滿,背後亦謙虛有禮,阿酸認為這亦是成為DJ的重要條件,「有個前輩同我講,你做DJ把聲好甜,係咪實有人鍾意你?你好靚仔係咪實有人鍾意你呢?唔係,其實佢哋鍾意你,係鍾意你嘅性格!」

 

阿酸從小聽商台節目長大, 對電台產生濃厚的感情,最喜歡就是聽森美小儀的《架勢堂》,「有一段時間《架勢堂》就轉咗去朝早,上緊堂無得聽點算呢?聽唔到佢哋把聲我全日都會唔舒服,於是我做咗樣嘢,以前中學女仔成日著長袖冷衫,我就將MP3機收埋喺袖口位,然後將耳筒線穿過手袖,再戴上耳機,伏喺枱上,一隻耳聽森美小儀、一隻耳聽書,哈哈哈!」

 

想不到小時候的夢想,長大以後終能實現。現時,阿酸主要負責三個節目,都跟廣東歌緊扣在一起。回顧樂壇近年起起跌跌,阿酸坦言電視台的選秀節目,以及組合MIRROR的出現,的確帶動大眾更關注樂壇。而社會氣氛亦令不少人希望在廣東歌中找到共鳴,「當成個社會,有多嘢未必能夠由我哋把口去講出嚟嘅時候,可能用音樂就係一個途徑,去抒發好多嘢。一首Hit嘅歌,我聽緊嘅時候,喺香港某個角落,原來都有另一個人聽緊,同樣被呢首歌觸動,咁就證明咗,我哋唔同嘅人有個Connection(連繫)喺度。」

 

阿酸希望透過歌詞及旋律,陪伴聽眾度過喜與悲,而「陪伴」正是電台的一大特色,令它不致淹沒在時間洪流中,「我明白啲人而家成日話,呢個世界上,你要出聲、要發聲,要講嘢俾人聽嘅途徑有好多,尤其係internet(網絡)嘅興起,但係電台有一樣嘢,係其他媒體代替唔到,就係二十四小時嘅陪伴,咁所以其實係唔會沒落!」

 

點一首疫情下的歌

 

過去數年香港接連爆發前所未見的社會運動和新冠病毒疫情,加上生活和學業壓力等其他因素,使青年身心健康發展面臨嚴峻的挑戰。當大家都困在這個城市當中,廣東歌似乎起了一個紓緩和打氣的作用,特別是過去兩三年,香港人在疫情的陰霾下特別容易感到迷惘。如果要用一首歌總結疫情下的香港,阿酸想起了Luna Is A Bep的《每當幻變時》,歌詞是這樣寫的:

 

「變化了 有變卦了/ 很多東西都分析不了⋯⋯

到海角都不怕 / 天際都不怕 / 同一天空下 / 可會都牽掛 / 經得起變化」

 

阿酸一面點頭哼歌一面道:「面對種種嘅改變嘅時候,係乜嘢令到我哋覺得,我要繼續生存落去生活落去嘅勇氣,就係喺同一遍天空下。你抬頭你望一望個天,你就會發覺原來你身邊嘅人,同你經歷緊同一樣嘅嘢,所以我們並不孤單。同埋呢首歌呢,其實係向《每當變幻時》呢首歌致敬,講緊《每當變幻時》已經係1977年嘅作品啊,當年嘅人有呢個諗法,佢哋要經歷好多唔同嘅改變 ,其實要面對轉變呢樣嘢,係我哋每個人都一定要經歷,無論係邊個時代!」

 

上世紀七十年代,有不少描繪小市民生活的廣東歌;一直到2021年,有多首歌記載着港人離家的哀傷,廣東歌其實一直在記錄時代的轉變,也有治癒人心的作用。歌詞裏面的故事就像你和我的日常寫照,一起感動一起抱擁,沿途高低伴着走過考驗與消磨。 假使世界原來不像你預期,留下來的人都要好好地過。願樂壇不死,我們繼續擁抱新聲音,保育廣東歌文化,訴說屬於香港的故事。

 

 

 

原文刊於《香港01》